விழி நீர்
கசியும் போதெல்லாம்
குடை கேட்கிறது
கன்னம்!

-

இதய அறுவை
சிகிச்சையின் போது
இனி இவர் பிழைக்கவே மாட்டார்
என்று அறிந்ததும்
மருத்துவரின் இதய‌ம்
அறுவை செய்யப்படாமலே
அறுபடுகிறது!..

-

பரிச்சயமில்லாத உன்னை
பல சிந்தனைகளுடன்
முதல் முறை
கொஞ்சம் காபியோடு
கொஞ்சும் உன் கரும்பு மொழியில்
கண்டவுடன் முதல் சந்திப்பே
இந்த காலமெல்லாம் நீளாதா
என்று நினைக்க வைக்கிறதே!..

-

மீசை அரும்பிய முகம்
பார்த்து மகன் முழு மனிதனாய்
உணரும் போது
அப்பாவும் கண்ணாடி பார்க்கிறார்
அடர்த்தியான  மீசை
நரைத்திருந்தது
மகனை  விட தனக்கு
வேகமாக வயதாவதை
முதன் முதலாக
உணர்கிறார்!..

-

தொடர்கதை சிறுகதையாகி
சிறுகதை கட்டுரையாயாகி கட்டுரை கவிதையாகி
கவிதை வரிகளாகி
வரிகள் வார்த்தையாகி
வார்த்தைக்கும்
முற்றுப்புள்ளி வைத்து
முடிவு எழுதினாய்
நீ முடித்த முடிவுரைக்கு
நான் மீண்டும் முன்னுரை
எழுத முனைகிறேன்!..

-

உதவி என்றாலே
உள்ளத்தில் இருந்து உதிப்பது
அதிலும் எதிர்பாரத உதவி
இன்னும் பெரிது
மனம் தவிக்கும்
எதிர்பாராத நேரத்தில்
மறு கை நீட்டி
மனம் நெகிழ வைக்கும்
எதிர்பாராத உதவியெல்லாம்
ஏதோ ஒரு நாள் செய்த
புண்ணியத்தின் பலன்
அந்த இன்பத்தை
உலகுக்கு உரைக்க தான் ஆசை
எப்படி சொல்வதென்று தெரியாமல் தவிப்போடும்
நன்றியோடும் வார்த்தை நின்று விடுகிறது
அந்த அன்புக்கும் உதவிக்கும்
ஆயுளெல்லாம் அடிமையாய் இருந்தாலும் தீராது!..

-

இரவு தொடங்கி
இருள் சூளும் நேரம்
பௌர்ணமி நிலவோடு
மங்கிய தெருவிளக்கில்
இரவிடம் சொல்வேன்
நீயும் பகலிடம் இரவல்
வாங்கி இரவாய் நீண்டிரு
நான் காலமெல்லாம்
அப்பாவின் கைப்பிடித்து
நடக்க!..

-

மௌனம் சம்மதத்தின்
மொழி மட்டும் இல்லை
சங்கடத்தின் மொழியும் கூட
அதில் பிறவா வரம்
வாங்கி வந்த விருப்பம்
என்னும் குழந்தை
கலைந்து கொண்டே இருக்கிறது!..

-

மரணத்தை அனுபவித்து இருக்கிறீர்களா?
மனமறிந்து துரோகம்
செய்து பாருங்கள்
அதன் மார்க்கம்
மரணத்தை விட
மரணம் வரை
நரக வேதனையை
கொடுத்துக் கொண்டே இருக்கும்!..

-

பேருந்தில் ஜன்னலோர
இருக்கை அமையும் போதெல்லாம்
எண்ணி நெகிழ
ஏராளமான விஷயம் இருக்கும்போது
மனம் கவலையோடும்
கண்ணீரோடும்
கைக்கோர்த்து விடுகிறது!..

-