രണ്ടറ്റം

കെട്ട് പിണർന്നവയെല്ലാം
രണ്ടറ്റം തേടി നടന്നവരാകാം.

കൂട്ടുപിരിഞ്ഞവരെല്ലാം
തന്നെതേടിയലഞ്ഞവരല്ല.

അങ്ങേയറ്റമടുക്കാൻ ഇങ്ങീവാനിൽ
നക്ഷത്രങ്ങൾ തീ തിന്ന് നടപ്പൂ.

വയലറ്റം താണ്ടിയവരെവിടെ
വയററ്റം നിറയാറില്ലേ
വഴിയറ്റം താണ്ടാറില്ലേ

ഒറ്റക്കയറിൽ ആടിയുലഞ്ഞവരെന്തെ
കാണാമറ്റം കണ്ടോ.
തലയറ്റിട്ടും തലയറ്റം കണ്ടില്ലേ.

കണ്ണറ്റം കണ്ടവയെല്ലാം
മണ്ണറ്റം കാണില്ലേ.

മൂക്കറ്റംമോന്തിയതോന്നും
കുഴിയറ്റം കാണാനല്ല

പെരുവിരലറ്റം കെട്ടിവലിക്കാൻ
രണ്ടറ്റം തികയില്ലേ

നിഴലറ്റം മായും
ജീവിതവഴിയറ്റം തെളിയും
അറ്റകാലങ്ങൾക്കൊപ്പമായ്‌
തെളിയോർമ്മകൾതൻ രണ്ടറ്റം.

-

ഓർമ്മതൻ
നിറവിൽ
തെളിയും
കണിക്കൊന്നയും
കാലവും
പിന്നിൽ കണ്ണ്പൊത്തും
കരങ്ങളും
കണ്ണീർ നനവിലലിയും
ഒറ്റരൂപാത്തുട്ടും

-

എന്നുള്ളം
നിറയ്യ്ക്കാനെന്നിൽ
പെയ്യ്തലിയുന്ന
വേനൽമഴയായാണ്
നീ


നിൻ സ്നേഹജലത്താൽ
വറ്റിവരണ്ടൊരു തൊണ്ട
നനയ്ക്കാൻ
ഞാനും.

-

മഴതോർന്നെൻ
ഇടനെഞ്ചിൽ
ഓർമ്മതൻ
മിഴിവാർന്ന്
കനവിൻ മഴപ്പാറ്റകൾ
ചിറക്കറ്റ് തലതല്ലി അലറുന്നു
ദിശതെറ്റിയകലുന്ന മഴപ്പക്ഷിയും
കൂട്ടിന്ന നിനവിൻ
ഒറ്റ മരപ്പെയ്ത്തിൽ
ഊർന്നൊലിക്കുമൊരുതുള്ളിയും

-

ഇനിയാ
മഴക്കാർദ്രതയില്ല
കാറ്റിനാ ചെമ്പകപ്പൂവിന്റെ
സുഗന്ധമില്ല
കോടമഞ്ഞിനാത്തണുപ്പില്ല
എന്നിട്ടും ഓർമ്മകൾക്കെന്നും
ചന്തം തന്നെ

-

പ്രണയം
ആർദ്രമാകുന്നു
അടുത്ത് നിന്നും കാണുമ്പോൾ
പ്രണയം നൈമിഷികമാകുന്നു

-

കാറ്റിൽ
പറക്കുമൊരുതരിമണലായ്
ജീവിതം

-

തൂലിക
തുമ്പിലെത്തും
മുൻപ് മൃതിയടഞ്ഞ
വരികൾക്കെല്ലാം
ഒരായിരം കഥകൾ
പറയാനുണ്ടായിരുന്നു

-

ഓർമ്മകൾ
പീലിനിവർത്തി
മനസ്സിൽ കാവടിയാടുന്നു
പാണ്ടിയും പഞ്ചാരിയും
നെഞ്ചിൽ താളം പിടിക്കുന്നു
ഹരിഹര മന്ത്രങ്ങൾ
കാതിൽ മുഴങ്ങുന്നു
മനം നിറയുന്നു

-

തിരികെ
വന്നീ
ഓർമ്മകളെ
നീ
തിരിച്ചെടുത്തീടുവിൻ

-