என் அதிகாலை தியானம்,
உன் பேச்சில் நிதானம் தவறி
உறங்க செல்கிறது,
மனம் முழுதும்
காதல் அலை...

-

எனக்கான உணவை
உண்பதை விடவும்
அதிக சுவை,
அவள் எனக்காக
சமைப்பதை
ரசிப்பதில்
இருக்கிறது.

-

அதிகாலை சூரியன்
உன்னைத் தேடி திரிகிறது,
இரவு முழுதும்
தேக்கி வைத்த காதலோடு
உன் வீடு பூட்டி கிடக்க
பெருங்கோபம் தலைக்கேறி
சுட்டெரிக்கிறது...

கத்திரி வெயில்
குளிர் காதல் செய்யும்
முகம் காட்டு
உலக அழகி.

-

தூரிகையில் ஒளிந்து நிற்கும்
தேவதைக்காக
ஓவியனாகிறேன்,
சிதறும் வண்ணங்களோடு
துள்ளி ஓடி கடலில் நீந்துகிறாள்,
அலையாகி அமிழ்ந்து,
நுரையாகி நிறைகிறேன்,
கரையெங்கும்
அவள் காலடி தடங்கள்.

-

ஸ்லோமோஷன்
பட்டாம்பூச்சியாய்
படபடத்து, சிறகுவிரித்து,
என் மீது பாய்ந்து,
மீண்டும்
உறங்குகிறாள்
மியா.

-

சிரமமா இருந்தா
மறக்கலாம்,
ஆனா மறக்குறதே
சிரமமா இருக்கே,
என்ன செய்றது,
உன்ன
நினைச்சிக்கிட்டே
இருந்துடுறேன்.

-

நீ என்னை பார்க்கும்போது
கடவுளாகிறேன்,
நீ என்னை வெறுக்கும்போது
வெறும் கல்லாகிறேன்.

துதிப்போ,
சிலை உடைப்போ
செய்து விட்டு போ.

-

கடலும் வானமும்
சேர்ற இடத்துக்கு
கட்டுமரத்துல போக முடியாது,
கப்பல்ல தான் போக முடியும்ன்னு
நினைச்சிக்கிட்டு இருந்த
அந்த குட்டி பையனா
திரும்ப மாற சொல்ற
மியாவ எப்படி
அந்த கடற்கரையில இருந்து
வீட்டுக்கு கூட்டிக்கிட்டு வரது?

-

என் பெருங்கனவின்
அற்புதங்களில்
ஒன்றாக அவளின்
சிரிப்பும் ஸ்பரிசமும்
இன்று கிடைத்தது.

ஆசை யாரை விட்டது
புரண்டு படுத்துக்கொண்டேன்...

-

தூக்கி திரியும்
கூலம் நிறைத்த பையை
விசிறிவிட்டு,
நிலவொளியின் ஆக்கிரமிப்பில்
ஏதுமற்ற துறவியைப் போல
பயணிக்க தூண்டுகிறது
இந்த இரவு.

-