ಅತಿಯಾದ ಆಲೋಚನೆಗಳು ತಾರ್ಕಿಕ ಅಂತ್ಯದ ಬದಲಿಗೆ
'ಚಿಂತೆ'ಯ ಚಿತೆಯನ್ನು ಸಿದ್ಧಪಡಿಸುತ್ತವೆ
ಬದುಕಿನ ಜೀವಂತಿಕೆ ಇರುವುದೆ ಚಲನೆಯಲ್ಲಿ ಗಾಲಿಬ್
ನಿಂತ ನೀರಿಗೆ ಯಾವಾಗಲೂ ಪಾಚಿ ಕಟ್ಟುತ್ತದೆ

-

ಬಳಸಿಕೊಳ್ಳುವವರು ಇದ್ದಾರೆ ಇಲ್ಲಿ, ಎಚ್ಚರವಾಗಿರುವುದೇ ಸವಾಲಾಗಿದೆ
ಅನ್ಯರಿಂದ ಪಾರಾಗಬಹುದು ಜನಾಬ್ ನಮ್ಮವರಿಂದ ಸಾಧ್ಯವೇ ಇಲ್ಲ!!

-

ಕನ್ನಡಿ ಸುಳ್ಳು ಹೇಳಲ್ಲ ಅಂತಾರೆ ದೋಸ್ತ,
ಆದರೆ ಕನ್ನಡಿಯಲ್ಲಿ ಕಾಣೋದು ನಾವು ತೋರ್ಸಿದ್ದೆ ಅಲ್ವಾ
ನೆರಳು ಯಾವತ್ತೂ ಜೊತೆಯಲ್ಲೆ ಇರುತ್ತೆ ಅಂತಾರೆ,
ಒಮ್ಮೆ ಕತ್ತಲಲಿ ಅದನ್ನು ಹುಡುಕಿ ಕೊಡ್ತೀರಾ..?

-

ತಂತ್ರಜ್ಞಾನವು ಸತ್ಯ-ಮಿಥ್ಯಗಳ ನಡುವೆ
ಕಣ್ಣಾಮುಚ್ಚಾಲೆಯನು ಆಡುತ್ತಿದೆ ಗಾಲಿಬ್
ಸತ್ಯದ ಸಾಕ್ಷಾತ್ಕಾರ ಬಲು ದುಬಾರಿಯಾಗುತಿದೆ
ಎಲ್ಲದಕೂ ಬೆಲೆ ತೆತ್ತುವ ಕಾಲದಲ್ಲಿ

-

ಬರಹಗಾರರಿಂದ ಬರಹವನ್ನು ಗುರುತಿಸಲಾಗದು
ಬರಹದಿಂದ ಬರಹಗಾರರನ್ನು ಗುರುತಿಸಲಾಗುತ್ತದೆ

-

ಬರಹದಿಂದ ಬರಹಗಾರ ಶ್ರೇಷ್ಠರಾಗಲು ಸಾಧ್ಯ
ಬರಹಗಾರರಿಂದ ಬರಹವನ್ನು ಅಳೆಯಲಾಗದು

-

ಆಯಕಟ್ಟಿನ ಸ್ಥಳಗಳಲ್ಲಿ ಚುನಾವಣೆ ತಕ್ಕಡಿ ಹಿಡಿದು ನಿಲ್ಲದಿರಲಿ
ಮಾರಿಕೊಂಡ ಹಕ್ಕು ಗುಲಾಮಗಿರಿಯ ಭಾವವನ್ನು ಬಿತ್ತುತ್ತದೆ

-

ಸಿರಿತನದ ಅಂಗಳದಲ್ಲಿ 'ಸೋಮಾರಿತನ'ಕ್ಕೂ ಬೆಲೆಯಿದೆ ಗಾಲಿಬ್
ಬಡತನದ ಬೆವರಿನಲ್ಲಿ ಪಾಪ-ಪುಣ್ಯ ಗಳನ್ನು ಹುಡುಕುವವರಿದ್ದಾರೆ

-

'ಗೌರವ'ದಿಂದ ಹೊಟ್ಟೆ ತುಂಬುವಂತಿದ್ದರೆ ಎಷ್ಟು ಚೆನ್ನಾಗಿರುತಿತ್ತು
ಈ ದುನಿಯಾ ದುಡ್ಡಿನ ಹಿಂದೆ ಓಡುವುದು ತಪ್ಪುತ್ತಿತ್ತು ಗಾಲಿಬ್

-

ಧರ್ಮಗಳು ಸಾಮರಸ್ಯದ ಹಣತೆಯಾಗಬೇಕೆ ಹೊರತು
ನೆಮ್ಮದಿ ಕದಡುವ ಬೆಂಕಿಯಾಗಬಾರದು
'ರಾಜಕೀಯ' ಉಪ್ಪಿನಕಾಯಿ ಆಗಬೇಕೆ ಹೊರತು
ಬಾಳು ಮೂರಾಬಟ್ಟೆ ಮಾಡುವ ಅನ್ನವಾಗಬಾರದು

-