ಹೃದಯ ಹೂದೋಟದಲಿ ಬಿರಿಯ ಬಯಸಿಹ ಮೊಗ್ಗುಗಳು ,
ಕಾತರದಿ ಕೌತುಕದಿ ಎನ್ನಿನಿಯನ ಬರುವಿಕೆಗೆ ಅರಳಬಯಸಿ ಕಾದಿಹವು.
ನಗೆ ಮೊಗ್ಗುಗಳು, ಮನದಾಳ ಪರಿಮಳದ ಭರಣಿ
ಸೂಸುವ ಸುಗಂಧದಲಿ ಶೃಂಗಾರ ಕಾವ್ಯವೊಂದಕೆ
ಸಾಕ್ಷಿಯಾಗುವಾಸೆಯಲಿ, ಬಿರಿಯ ಬಯಸಿಹ
ಮೊಗ್ಗುಗಳು ಕಾದಿಹವು.
ಬಂದು ಬಿಡು ಒಡೆಯಾ, ಇನ್ನೆಷ್ಟು ಕಾಯುವಿಕೆ,
ಎನ್ನೊಡಲ ವಿರಹ ಬೇಗೆ ನಗೆ ಮೊಗ್ಗುಗಳ ನಲುಗಿಸೀತು,
ಅರಳಿ ಬಿರಿಯುವ ಮುನ್ನ ಮೊಗ್ಗುಗಳ ನಗೆ ಕಮರಿಹೋದೀತು,
ಬಂದು ಬಿಡು ಒಡೆಯಾ,
ತಲ್ಲಣಿಸಿ ಕಾಯುತಿಹ ಜೀವ ತುಸು ತಂಪಾಗಲಿ,
ನಗೆ ಮೊಗ್ಗುಗಳು ಬಿರಿದು ಸುಗಂಧ ಹೊರಸೂಸಿ,
ಶೃಂಗಾರ ಕಾವ್ಯ ಕಾಲ ನಮದಾಗಲಿ,
ನಮದೆಂಬುದೊಂದಿರದೇ ರಮ್ಯತೆಯ ಭವ್ಯ
ಮೈತ್ರಿಯಲಿ ನಾನೀನು ಅಳಿವಂತೆ ಎಲ್ಲಾ ಲೀನವಾಗಲಿ.
-